Polad İsrayıl oğlu Həşimov 2 yanvar 1975-ci ildə Qəbələ rayonunun Vəndam qəsəbəsində anadan olub. Sonralar ailəsi ilə birlikdə Sumqayıt şəhərinə köçüb. 1992-ci ildə Sumqayıt şəhər 34 nömrəli tam orta məktəbini bitirdikdən sonra Heydər Əliyev adına Azərbaycan Ali Hərbi Məktəbinə daxil olub və 1995-ci ildə motoatıcı ixtisası üzrə məzun olub.
Polad Həşimovun məktəb illəri Ermənistanın Azərbaycana qarşı hərbi təcavüzünün ən ağır dövrünə təsadüf edib. Vətən torpaqlarının işğalı gənc Poladda hərbçi olmaq və doğma torpaqların müdafiəsində iştirak etmək əzmini daha da gücləndirib. O, hərbi təhsil aldığı ilk illərdən etibarən ön cəbhədə xidmət edərək Azərbaycan Ordusunun formalaşmasına və döyüş qabiliyyətinin yüksəldilməsinə mühüm töhfələr verib.
Gənc zabit kimi xidmətə başladığı dövrdən etibarən bir sıra döyüş əməliyyatlarında iştirak edib, peşəkarlığı, cəsarəti və yüksək komandanlıq bacarığı ilə seçilib. O, hər zaman şəxsi heyətlə eyni səngərdə olub, əsgərlərinə nümunə göstərərək döyüş tapşırıqlarının uğurla yerinə yetirilməsinə rəhbərlik edib.
2016-cı ilin Aprel döyüşləri zamanı Ermənistan silahlı qüvvələrinin təxribatlarının qarşısının alınmasında və Tərtər rayonunun Talış kəndi istiqamətində strateji yüksəkliklərin azad edilməsində general-mayor Polad Həşimovun mühüm xidmətləri olub. Onun rəhbərlik etdiyi əməliyyatlar Azərbaycan Ordusunun qələbəsində xüsusi rol oynayıb. Talış istiqamətində yerləşən döyüş mövqelərindən biri bu gün də xalq arasında “Polad postu” adı ilə tanınır.
2019-cu ildə Polad Həşimova general-mayor ali hərbi rütbəsi verilib və o, Azərbaycan Ordusunun korpuslarından birinin qərargah rəisi vəzifəsinə təyin olunub. Xidməti dövründə Vətən qarşısındakı xidmətlərinə görə bir sıra orden və medallarla təltif edilib. Aprel döyüşlərində göstərdiyi igidliyə görə Azərbaycan Respublikası Prezidentinin Sərəncamı ilə II dərəcəli “Vətənə xidmətə görə” ordeni ilə mükafatlandırılıb.
2020-ci il iyulun 14-də Ermənistan silahlı qüvvələrinin Tovuz rayonu istiqamətində törətdiyi növbəti hərbi təxribatın qarşısını alarkən general-mayor Polad Həşimov ön xətdə döyüşə rəhbərlik edərkən qəhrəmancasına şəhid olub. Onun şəhadəti Azərbaycan cəmiyyətində böyük kədər və qürur hissi ilə qarşılanıb, minlərlə insan Milli Qəhrəmanın son mənzilə yola salınmasında iştirak edib.
Azərbaycan Respublikası Prezidentinin müvafiq Sərəncamı ilə general-mayor Polad İsrayıl oğlu Həşimova ölümündən sonra “Azərbaycanın Milli Qəhrəmanı” adı verilib.
Polad Həşimov Azərbaycan hərb tarixində cəsur sərkərdə, vətənpərvər zabit və əsgərinə arxa-dayaq olan nümunəvi komandir kimi əbədi yaşayacaq. Onun adı qəhrəmanlıq, şərəf və Vətənə sonsuz sədaqətin rəmzi kimi xalqımızın yaddaşında daim yaşayır.
Xaliq Pəhlivanoğlu
