Zabit Adil oğlu Quliyev 6 iyun 1975-ci ildə Kürdəmir rayonunun Ərəbxana kəndində anadan olub. 1992-ci ildə Ərəbxana kənd orta məktəbini bitirdikdən sonra bir müddət doğma kəndində əmək fəaliyyəti ilə məşğul olub, mexanizator kimi əkinçilik və təsərrüfat işlərində çalışıb. Zəhmətkeş ailədə böyüyən Zabit Quliyev gənc yaşlarından əməksevərliyi və məsuliyyəti ilə seçilib.
1993-cü ilin sentyabr ayında Kürdəmir Rayon Hərbi Komissarlığı tərəfindən həqiqi hərbi xidmətə çağırılaraq Azərbaycan Milli Ordusunun sıralarına qəbul edilib və birbaşa cəbhə bölgəsinə göndərilib. Qısa müddətdə özünü cəsur əsgər, peşəkar döyüşçü və mahir atıcı kimi təsdiq edib.
Zabit Quliyev Birinci Qarabağ müharibəsi zamanı Füzuli, Ağdam, Ağdərə və Tərtər istiqamətlərində gedən ağır döyüşlərdə böyük igidlik nümayiş etdirib. Ən çətin döyüş şəraitində belə soyuqqanlılığını qoruyaraq düşmənin canlı qüvvəsinə və hərbi texnikasına ciddi zərbələr endirib. Onun sərrast atəşi nəticəsində düşmənin bir neçə hücumunun qarşısı alınıb.
Qəhrəmanın ən yaddaqalan döyüş uğurlarından biri Seysulan kəndi uğrunda gedən döyüşlər zamanı qeydə alınıb. Belə ki, Zabit Quliyev həmin döyüşlərdə düşmənə məxsus dörd tankı məhv edərək Azərbaycan Ordusunun mövqelərinin qorunmasına mühüm töhfə verib.
Müharibənin bütün çətinliklərini və ağır sınaqlarını şərəflə yaşayan Zabit Quliyev göstərdiyi şücaət, döyüş əzmi və vətənpərvərliyi ilə silahdaşlarının dərin hörmətini qazanıb. Onun qəhrəmanlıq yolu bu gün də gənc nəslə Vətənə sədaqətin, cəsarətin və fədakarlığın nümunəsi kimi örnək göstərilir.
Azərbaycan Respublikası Prezidentinin 4 aprel 1995-ci il tarixli 307 nömrəli Fərmanı ilə Zabit Adil oğlu Quliyevə göstərdiyi igidliyə görə “Azərbaycanın Milli Qəhrəmanı” adı verilib.
Birinci Qarabağ müharibəsinin qəhrəman iştirakçısı olan Zabit Quliyev sonrakı dövrdə də Vətənə xidmətini davam etdirərək 44 günlük Vətən müharibəsinin qazisi adını da qazanıb.
Milli Qəhrəman Zabit Quliyev ailəlidir, bir övladı var.
Zabit Quliyevin şərəfli döyüş yolu Azərbaycanın hərb tarixində qəhrəmanlıq, mərdlik və Vətənə sonsuz sədaqətin parlaq nümunələrindən
Xaliq Pəhlivanoğlu
