Yaşar Füzuli oğlu Sadıqov 10 avqust 1975-ci ildə Füzuli rayonunun Bala Bəhmənli kəndində anadan olub. O, 1992-ci ildən Azərbaycan Silahlı Qüvvələrinin sıralarında hərbi xidmət keçib.
Yaşar Sadıqov 2020-ci il sentyabrın 27-də başlayan Vətən müharibəsi zamanı Murovdağ istiqamətində gedən döyüşlərdə iştirak edib. O, 3 oktyabr 2020-ci ildə Murovdağ döyüşləri zamanı şəhid olub. Uzun müddət onun nəşi tapılmayıb.
Təltifləri
Yaşar Sadıqov hərbi xidməti müddətində aşağıdakı medallarla təltif olunub:
• III dərəcəli “Qüsursuz xidmətə görə” medalı;
• II dərəcəli “Qüsursuz xidmətə görə” medalı;
• I dərəcəli “Qüsursuz xidmətə görə” medalı;
• “Azərbaycan Silahlı Qüvvələrinin 90 illiyi” yubiley medalı;
• “Azərbaycan Silahlı Qüvvələrinin 95 illiyi” yubiley medalı;
• “Azərbaycan Silahlı Qüvvələri Veteranı” medalı;
• “Azərbaycan Ordusunun 100 illiyi” yubiley medalı.
Murovdağ döyüşləri
Yaşar Sadıqovun şəhid olması barədə ilk məlumatlardan biri 2020-ci il Vətən müharibəsi zamanı Ermənistan tərəfinin yaydığı görüntülərdə yer alıb.
Oktyabrın 13-də yayılan videomaterialda Murovdağ istiqamətində, Ömər aşırımı ərazisindən reportaj hazırlayan erməni jurnalist həmin ərazinin dəniz səviyyəsindən təxminən 3300 metr yüksəklikdə olduğunu bildirib.
Videoda müsahibə verən erməni hərbçiləri Azərbaycan xüsusi təyinatlılarının səhər saatlarında mövqelərinə hücum etdiyini bildiriblər. Onlardan biri döyüşlər zamanı Azərbaycan hərbçilərinin itkilər verdiyini iddia edib və Yaşar Sadıqovun nəşini göstərərək onun komandir və polkovnik-leytenant olduğunu qeyd edib.
Həmin görüntülər Yaşar Sadıqovun Murovdağ istiqamətində gedən ağır döyüşlərdə qəhrəmancasına şəhid olduğunu göstərən müharibə dövrü materiallarından biri kimi təqdim olunub.
Xaliq Pəhlivanoğlu
