Azərbaycan Ordusunun igid zabitlərindən biri olan şəhid Baş leytenant Allahyar Telmanlı Vətən müharibəsində göstərdiyi şücaət və fədakarlıqla xalqımızın yaddaşında əbədi iz qoymuş qəhrəmanlardandır.
Allahyar Telmanlı 1 sentyabr 1992-ci ildə Naxçıvan Muxtar Respublikasının Şərur rayonunun Yengicə kəndində anadan olmuşdur. Orta təhsilini başa vurduqdan sonra hərbçi peşəsini seçərək 2010-cu ildə Heydər Əliyev adına Azərbaycan Ali Hərbi Məktəbinə qəbul olmuş, 2014-cü ildə həmin təhsil ocağını uğurla bitirmişdir. Təhsilini başa vurduqdan sonra Azərbaycan Ordusunun zabiti kimi müxtəlif hərbi hissələrdə xidmət etmiş, peşəkarlığı, məsuliyyəti və vətənpərvərliyi ilə seçilmişdir.
2020-ci il sentyabrın 27-də başlayan Vətən müharibəsində Allahyar Telmanlı ön cəbhədə döyüşlərə qatılmışdır. O, Cəbrayıl rayonunun işğaldan azad edilməsi uğrunda gedən döyüşlərdə böyük igidlik və mərdlik nümayiş etdirmiş, döyüş tapşırıqlarını layiqincə yerinə yetirərkən qəhrəmancasına şəhid olmuşdur.
Şəhid zabitin Vətən qarşısındakı xidmətləri dövlət tərəfindən yüksək qiymətləndirilmişdir. Azərbaycan Respublikası Prezidentinin sərəncamları ilə Allahyar Telmanlı ölümündən sonra “Vətən uğrunda”, “Cəbrayılın azad olunmasına görə” və “İgidliyə görə” medalları ilə təltif edilmişdir.
Xaliq Pəhlivanoğlu
