Prezident təqaüdçüsü öz kəndinin tikintisində iştirak edəcək-FOTO
Azərbaycan Jurnalistlər Birliyinin və Yazıçılar Birliyinin üzvü, Prezident təqaüdçüsü olan, 1985-ci ildə dünyaya göz açdığı doğma Zar kəndinin yetirməsi kimi çıxış edən ziyalı bu layihədə bilavasitə iştirak edəcəyini bildirib. Onun sözlərinə görə, təkcə jurnalist və yazar mövqeyindən yox, həm də bir doğmalıq hissi ilə bu prosesə nəzarət edəcək, görülən işləri diqqətlə izləyəcək və cəmiyyətə obyektiv məlumatlar çatdıracaq:
“120 milyon manatlıq bir layihə həyata keçirilir. Qoy bu məbləğin hər manatı kəndimizin dirçəlməsi üçün sərf olunsun. İstəyirik ki, tikilən evlər keyfiyyətli olsun, insanlar orada rahat yaşasın. Qayıdışın bu mərhələsi həm də mənəvi bir məsuliyyətdir.”
Zar kəndinin bərpası yalnız tikinti işlərindən ibarət deyil. Bu, həm də illərlə həsrətində olduğumuz yurd yerlərinə qayıdışın, yeni həyatın, yeni ümidlərin başlanğıcıdır. Tikiləcək hər ev, qurulacaq hər bina bu torpağın ruhunu daşımalı, şəhidlərin qanı ilə suvarılmış bu diyara layiq olmalıdır. Bu layihənin gedişində ictimai nəzarətin gücləndirilməsi, yerli medianın və vətəndaş cəmiyyətinin prosesə cəlb olunması, hesabatlılığın təmin edilməsi mühüm əhəmiyyət kəsb edir. Əgər bu prinsiplər qorunarsa, Zar kəndi yaxın illərdə Qarabağ və Şərqi Zəngəzur regionunda yenidən dirçələn yaşayış məntəqələri üçün nümunəvi modelə çevrilə bilər. Qeyd edim ki, quruculuq işlərini “Amozon” şirkəti həyata keçirəcək. Şirkətin rəhbərliyi başda olmaqla, layihədə çalışan hər bir əməkdaşa təşəkkür edir, onlara uğurlar arzulayıram. Zar kəndində təkcə evlər deyil, gələcəyin təməli qoyulur.
