Azərbaycanın müstəqilliyi və ərazi bütövlüyü uğrunda canından keçən qəhrəmanlardan biri də polis kapitanı Əli Hüseyn oğlu Məmmədovdur. O, Birinci Qarabağ müharibəsi zamanı göstərdiyi igidlik və fədakarlıqla Azərbaycan tarixində özünəməxsus iz qoyub.
Əli Məmmədov 1955-ci il avqustun 11-də Naxçıvan şəhərində anadan olub. Orta təhsilini Bakı şəhərindəki 255 nömrəli məktəbdə alıb. 1975-ci ildə hərbi xidmətə çağırılıb və xidmətini Macarıstanda başa vurub. 1982-ci ildə Polis Akademiyasına daxil olaraq hüquq-mühafizə sahəsində fəaliyyət göstərib.
1992-ci ildə Qarabağda döyüşlərin ən ağır mərhələlərindən birində Əli Məmmədov Vətənin müdafiəsinə qalxaraq cəbhəyə yollanıb. O, Laçın istiqamətində gedən döyüşlərdə iştirak edib və döyüş yoldaşları ilə birlikdə yüksəkliklərin müdafiəsində böyük şücaət göstərib.
1992-ci il oktyabrın 1-də Laçın cəbhəsində Azərbaycan mövqelərinə güclü hücum zamanı ağır döyüş başlayıb. Həmin döyüşdə Əli Məmmədov yaralıların təhlükəsiz əraziyə çıxarılmasına kömək edib, daha sonra döyüşün ən qaynar nöqtəsində mübarizəni davam etdirib. Başından ağır yaralanan qəhrəman elə həmin döyüşdə şəhid olub.
Əli Məmmədovun göstərdiyi qəhrəmanlıq dövlət tərəfindən yüksək qiymətləndirilib. Azərbaycan Respublikası Prezidentinin 19 oktyabr 1992-ci il tarixli 273 nömrəli fərmanı ilə polis kapitanı Əli Hüseyn oğlu Məmmədova ölümündən sonra “Azərbaycanın Milli Qəhrəmanı” fəxri adı verilib.
Ailəli olan Əli Məmmədov iki övladını yadigar qoyub. O, Bakı şəhərində yerləşən Şəhidlər xiyabanında dəfn edilib. Paytaxt küçələrindən birinə onun adı verilib.
Bu gün, avqustun 11-də Azərbaycanın Milli Qəhrəmanı Əli Məmmədovun doğum günüdür. Onun doğum günü, Vətən uğrunda həyatını qurban vermiş qəhrəmanımızı bir daha ehtiramla yad etmək üçün əlamətdar gündür.
Əli Məmmədovun ömür yolu qısa olsa da, onun Vətən qarşısındakı xidmətləri və göstərdiyi qəhrəmanlıq xalqımızın yaddaşında əbədi yaşayacaq. Onun həyat və döyüş yolu gələcək nəsillər üçün Vətənə sədaqət, cəsarət və fədakarlıq nümunəsidir.
Milli Qəhrəmanımızı doğum günündə dərin ehtiram və hörmətlə anırıq.
Xaliq Pəhlivanoğlu
