Hindistan Rusiyadan bir ayda 215 milyon dollarlıq brilyant alıb

Avqustda Hindistan Rusiyadan 2018-ci ilin mart ayından sonra yüksək məbləğdə – 215,1 milyon dollar dəyərində brilyant partiyası alıb.

Qaynarinfo bu barədə Hindistanın Ticarət və Sənaye Nazirliyinin məlumatlarına istinadən xəbər verir.

Yayın son ayında Hindistan Rusiya almazlarının idxalını aylıq ifadədə 4 dəfə, illik ifadədə isə 9% artırıb. 2018-ci ilin mart ayında ölkə bir anda 481 milyon dollar dəyərində bu qiymətli daşlar alıb.

Ümumilikdə, 2023-cü ilin əvvəlindən Hindistan şirkətləri Rusiyadan 863 milyon dollara almaz alıblar ki, bu da 2022-ci illə müqayisədə 29% çoxdur.

Oktyabrın əvvəlində Avropa İttifaqı Şurasının rəhbəri Şarl Mişel bildirmişdi ki, Aİ Rusiya almazlarına qarşı sanksiyalar hazırlayır və bu sanksiyalar gələn ildən qüvvəyə minəcək.