Şəhid Milli Qəhrəmanın adını daşıyan məktəbdə Şəhidlərimizin xatirəsinə bilik yarışı keçirildi
Şəhid Milli Qəhrəman Yusif Mirzəyev adına 44 saylı tam orta məktəbdə şagirdlər arasında Tarix fənni üzrə “brain-ring” yarışı keçirildi.
Hər zaman tariximizi, tarix yazan Qəhrəmanlarımızı tanıdan, Şəhidlərimizin xatirəsini gələcək nəsillərə ötürmək, vətənpərvərlik ruhunun məktəblilər arasında aşılanması məqsədilə yüksək səviyyədə tədbirlər keçirən Şəhid Milli Qəhrəman Yusif Mirzəyev adına 44 saylı tam orta məktəbdə 6 noyabr 2024-cü il tarixdə “8 noyabr – Zəfər günü ” münasibətilə məktəbin direktoru Əzizə xanım Abbasovanın rəhbərliyi, Tarix fənnini tədris edən Rauf müəllimin təşkilatçılığı ilə şagirdlər arasında Tarix fənni üzrə “brain-ring” yarışı keçirildi.
Yarışda məktəbin şagirdlərindən ibarət “Qarabağ “, “Xarı bülbül “, “Şahin “, “Turan”, “Qartal” komandaları Rauf müəllimin hazırladığı suallar əsasında yarışırdılar.
Yarışın sonunda 1-ci yerin qalibi “Şahin ” komandası, 2-ci yerin qalibi “Turan” komandası və 3-cü yerin qalibi “Qarabağ ” komandası diplomlar və hədiyyələr ilə mükafatlandırıldı.
Milli Qəhrəmanlar Təşkilatının sədr müavini, İdarə heyətinin üzvi, Xətai rayon nümayəndəliyinin sədri, Şəhid Milli Qəhrəman Rövşən Əliyevin bacısı Fəranə xanım Alıyeva həmin yarışda fəxri qonaq və münsif kimi iştirak edirdi.
İllərdir Şəhid Qəhrəmanlarımızın, Şəhidlərimizin xatirəsini yaşatmaq, onların təbliğatının yüksək səviyyədə aparılması istiqamətində əlindən gələni əsirgəməyən Fəranə xanım bu dəfə də məktəbli gənclərimizə vətənpərvərlik hissinin aşılanması, Azərbaycan Respublikasının torpaqlarının işğaldan azad olunması və ərazi bütövlüyünün bərpası uğrunda canlarından keçmiş Şəhidlərimizin gələcək nəsillərə tanıdılması məqsədilə Qəhrəmanlarımız haqqında tarixi biliklərini şagirdlərlə bölüşdü.
Daha sonra məktəbin müəllim heyətinin və şagirdlərinin rəğbətini qazanan Fəranə xanım Şəhid Milli Qəhrəman Yusif Mirzəyev adına 44 saylı tam orta məktəbin rəhbərliyi tərəfindən Fəxri Fərmanla təltif olundu.
Sonda isə xatirə şəkilləri çəkdirildi.
NƏRMİN SƏFƏROVA
VƏTƏNQƏHRƏMANLARI.AZ