Qurbanqulu Berdiməhəmmədov Rəhmonla Əfqanıstandakı vəziyyəti müzakirə edib

Türkmənistan Xalq Məsləhətinin (Xalq Şurasının) sədri Qurbanqulu Berdiməhəmmədov Tacikistan Prezidenti Emoməli Rəhmonla Əfqanıstandakı vəziyyəti müzakirə edib.

“Report” xəbər verir ki, bu barədə sabiq prezidentin Düşənbəyə səfərindən sonra Mərkəzi Asiya ölkəsinin rusdilli rəsmi qəzeti olan “Neytralnı Turkmenistan” məlumat yayıb.

Nəşrin məlumatına görə, görüş zamanı Berdiməhəmmədov qonşu regionlarda və ölkələrdə, xüsusən də Əfqanıstanda vəziyyətin inkişafı kontekstində regional təhlükəsizlik, habelə sabitliyə çağırışlar və təhdidlərə diqqət yetirib. O həmçinin əlavə edib ki, Türkmənistan əvvəllər Əfqanıstan probleminin həlli üçün regional amilin gücləndirilməsinin vacibliyini bəyan edib. Söhbət Əfqanıstanın qonşu dövlətləri arasında qarşılıqlı əlaqənin gücləndirilməsindən gedir, çünki onlar bu ölkədə sülhün və harmoniyanın tezliklə başlanmasında ən çox maraqlı tərəflərdir.

Berdiməhəmmədov aprelin 4-də Düşənbədə rəsmi səfərdə olub. Səfər ərəfəsində Tacikistanda Türkmənistanın Mədəniyyət Günləri başlayıb.