Şura üzvündən Fransaya qarşı sərt reaksiya: “Artıq qəti mövqe bildirməyin vaxtıdır”
Əhməd Abbasbəyli: “Dünya görməlidir ki, Azərbaycan xalqı Fransanın bu addımını qəbul etmir və qətiyyətlə etiraz edərək pisləyir”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, Ədliyyə Nazirliyi yanında İctimai şuranın üzvü Əhməd Abbasbəylinin noyabrın 15-də Fransa senatının Azərbaycanın əleyhinə qəbul etdiyi qərarla bağlı saytımıza müsahibəsini təqdim edirik
-Əhməd müəllim, Fransa senatının ölkəmizə qarşı məlum qətnaməni qəbul etməsi nədən irəli gəlir?
-Gözlənildiyi kimi, noyabrın 15-də Fransa öz çirkin oynunu oynamağa davam etdi. Senat Azərbaycana qarşı qətnamə qəbul etdi. Necə deyərlər “xoruz banladı”. Əslində, bu qərarın verilməsi məni heç də təəccübləndirmədi. Ermənistan-Azərbaycan münaqişəsi başlandığı gündən Fransa bu və ya digər formada Ermənistanın yanında olub. Sadəcə, bu günkündən fərqli olaraq, Fransa o dövrdə özünə imic yatmağa çalışırdı, ATƏT-in Minsk qrupu çərçivəsində münasibətlərini pərdələyirdi. Fransanın ozamankı rəhbərliyi bunu çox ustalıqla yerinə yetirə biliridi. Ümumiyyətlə, ATƏT-in Minsk qrupunun yaradılmasının missiyası münaqişəni dondurmaq, mümkün dərəcədə uzadaraq bir növ Azərbaycan xalqının şüurundan silmək və nəhayət də bu problemi yumşaq formada Ermənistanın xeyrinə nəticələndirmək idi. Bu missiya çərçivəsində təbii ki, Fransa Azərbaycana qarşı qərəzli münasibətini açıq bildirmək istəməzdi. Çünki oyun oynayırdı və oyunun qaydaları tələb edirdi ki, özünü vasitəçi kimi sırımağa çalışsın.
Azərbaycan dövləti də siyasi nəzakət göstərirdi, görməməzdikdən gələrək bu prosesi qəbullanmaq məcburiyyətində idi. Ümidimiz var idi ki, bu insanlarda nə vaxtsa ədalət hissi oyanacaq. Azərbaycan 30 il sülh yolunu gözlədi, amma alınmadı. Nəticəsi görünməyəndən sonra Azərbaycan dövləti hesab etdi ki, bu problemi özü həll edə bilər. Və nahəyət hərb yolu ilə Azərbaycan bu məsələni həll etdi. Bundan sonra Fransanın maskası yırtıldı. Artıq Fransa başqa cür münasibət göstərə bilməzdi də. Çünki Azərbaycan rəsmən bəyan etdi ki, Qarabağ problemini həll etdi. Bunun üçün digər dövlətlərin vasitəçiliyinə artıq ehtiyac yoxdur.
-Buna cavab olaraq hansı adekvat addımlar atılmalıdır?
-Fransa senatının çıxardığı bu qərar Azərbaycana qarşı hibrid müharibədir. Bu, Fransanın həm Azərbaycana, həm də Türkiyəyə qarşı Aralıq dənizində heğemonluq uğrunda həmləsidi. Biz buna qarşı konkret olaraq münasibətimizi bildirməliyik. Hesab edirəm ki, biz indiyədək Fransaya qarşı çox dözümlülük göstərmişik. Bizim nəzakətimizdən bu qədər də istifadə etmək olmaz! Yetər! Artıq ciddi tədbirlər görməyin, qəti mövqe bildirməyin vaxtıdır!
Milli Məclis Fransa senatının bu qeyri-obyektiv, qərəzli və çirkin davranışına ciddi münasibət bildirməlidir. Birmənalı şəkildə Fransanın istənilən formada bütün təkliflərindən imtina olunmalıdır. Azərbaycan-Ermənistan danışıqları prosesinə, ümumiyyətlə yaxın buraxılmamalıdır. Milli Məclis Fransanın Əlcəzairə qarşı törətdiyi vəhşilik və soyqırımı məsələsini müzakirəyə çıxarmalı və Fransanın Əlcəzair xalqınıa qarşı soyqırımı törətdiyini açıq şəkildə bəyan etməlidir. Bu soyqırımının qəbul edilməməsinin cinayət məsuliyyət yaradacağı barədə qanunvericlikdə dəyişikliyin edilməsi barədə qərar qəbul edilməlidir.
Vətəndaş cəmiyyəti, KİV bu prosesdə çox fəal olmalıdır. Azərbaycan dövləti çox gücüldür. Azərbaycan xalqı vahid ideya ətrafında birləşib. İstənilən dövlət; böyüklüyündən və ya kiçikliyindən, qədimliyindən və ya gəncliyindən asılı olamayaraq Azərbaycanı təhdid edirsə, ərazi bütövlüyümüzə qarşı çıxırsa, həmin dövlətə öz mövqeyimizi bildirməyə hazırıq. Azərbaycan vətəndaş cəmiyyəti, ümumiyyətlə xalqımız hər zaman Azərbaycan dövlətinin yanındadır. Dünya görməlidir ki, Azərbaycan xalqı Fransanın bu addımını qəbul etmir və qətiyyətlə etiraz edərək pisləyir.