Prezident İlham Əliyev: “Qoşulmama Hərəkatının sədri olaraq Azərbaycanın məqsədi ədaləti və beynəlxalq hüququ müdafiə etməkdir”
Martın 2-də Bakıda Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşünün keçirilməsi Azərbaycanın beynəlxalq miqyasda nüfuzunun daha da artmasından xəbər verir. Bu tədbirin beynəlxalq gücü və mötəbərliyi 70-ə yaxın ölkənin dövlət və hökumət başçılarının, baş nazirlərin, müxtəlif ölkələrin yüksək səviyyəli nümayəndələrinin, həmçinin beynəlxalq təşkilatların rəhbərlərinin, eyni zamanda, nazirlər, nazir müavinləri, səfirlərin və s. rəsmi statusa malik vəzifəli şəxslərin burada iştirakı da göstərir. Ən önəmli faktor isə Azərbaycanın Qoşulmama Hərəkatına sədrliyinin 2023-cü ilə kimi uzadılmasıdır. Bu, Azərbaycana olan beynəlxalq inam və etimadın bariz nümunsədir. Azərbaycan martın 2-də Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşünü yükəsk səviyyədə keçirməklə bu etimadı bir daha doğruldub. Prezident İlham Əliyev Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşündə Hərəkatın ali məqsədlərini xatırladıb: “Qoşulmama Hərəkatının sədri olaraq Azərbaycanın məqsədi ədaləti və beynəlxalq hüququ müdafiə etməkdir. Pandemiyanın başlamasından dərhal sonra COVID-19-a qarşı qlobal səyləri səfərbər etmək təşəbbüsü ilə çıxış edən məhz Qoşulmama Hərəkatı oldu”.
Qoşulmama Hərəkatı müasir dövürdə çoxtərəfli əməkdaşlıq baxımından mühüm əhəmiyyət daşıyır. Artıq Qoşulmama Hərəkatı qlobal problemləri güdəmə gətirir və həlli yollarını müzakirə edir. Elə Bakıda keçirilən Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşündə də dayanıqlı inkişaf, iqlim dəyişikliyinə qarşı mübarizə və sülhün bərqərar olunması istiqamətində müzakirələr aparılıb. Cənab Prezident açılış nitqində yeni dünya düzənin yenidən formalaşdığını deyib: “İndi dünya “Soyuq müharibə”nin sona çatmasından bəri baş verən ən ciddi Şərq-Qərb qarşıdurmasının şahididir ki, onun fəsadları dünyanın qalan hissəsində də hiss olunur. Qoşulmama Hərəkatı BMT-dən sonra ikinci ən böyük beynəlxalq təsisat kimi beynəlxalq arenada daha nəzərəçarpan və səmərəli rol oynamalı, yeni dünya düzəninin yenidən formalaşmasında fəal iştirak etməlidir”.
Azərbaycan Qoşulmama Hərəkatının inkişafına və beynəlxalq arenada onun nüfuzunun artmasına uğurlu töhfələr verir. Çox müsbət haldır ki, demək olarq ki, bütün çıxışçılar Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşünə ev sahibliyinə görə Prezident İlham Əliyevə və Azərbaycana minnətdarlığını bildiriblər. Zirvə görüşündə postpandemiya dövründə qlobal əməkdaşlığın, xüsusilə gənclər üçün lazımi şəraitin yaradılmasının və onların arasında əlaqələrin gücləndirilməsinin vacibliyi vurğulanıb. Bunun üçün institusional tədbirlərin görülməsinin önəmli olduğu qeyd edilib. Bu baxımdan Prezident İlham Əliyev tərəfindən bir sıra təşəbbüslər irəli sürlüb. Bunlardan Qoşulmama Hərəkatına üzv ölkələrin parlamentləri arasında əlaqələrin gücləndirilməsinə xidmət edən Parlament Şəbəkəsinin yaradılması ilə bağlı Azərbaycanın təşəbbüsünü qeyd etmək yerinə düşər. Həmçinin Azərbaycanın gənclərlə iş sahəsində – 2022-ci ilin iyulunda Qoşulmama Hərəkatının Gənclər Sammitinin keçirilməsi və Hərəkatın Gənclər Şəbəkəsinin təsis olunması ilə bağlı təşəbbüsləri də təqdirəlayiqdir. Məhz Azərbaycanın sədrliyi ilə Qoşulmama Hərəkatı dünya ictimaiyyətini pandemiya ilə mübarizədə səfərbər edib. Prezident İlham Əliyevin təşəbbüsü ilə 2020-ci ilin mayında Qoşulmama Hərəkatının COVID-19 ilə mübarizəyə həsr edilən onlayn sammiti keçirilib. Həmin ilin dekabrında isə BMT Baş Assambleyasının pandemiya ilə mübarizəyə həsr edilən Xüsusi Sessiyası təşkil olunub. Bu sessiya pandemiya ilə mübarizə sahəsində ən qlobal tədbir hesab olunur. Azərbaycanın təşəbbüsü ilə həm BMT Baş Assambleyasında, həm də BMT-nin İnsan Hüquqları Şurasında vaksinlərin ədalətli bölüşdürülməsinə dair qətnamələr qəbul edilib. Bütün bunlarla yanaşı, Qoşulmama Hərəkatına üzvlük və sədrlik Azərbaycana Ermənistanın təcavüzünə qarşı mübarizədə güclü beynəlxalq dəstək qazandırıb. Təsadüfi deyil ki, 2020-ci və 2022-ci illərdə BMT Təhlükəsizlik Şurasında Azərbaycana qarşı irəli sürülmüş qərəzli təşəbbüslərin qarşısı Hərəkata üzv dövlətlər tərəfindən alınıb. Göründüyü kimi, Azərbaycanın qlobal təşəbbüsləri beynəlxalq birlik tərəfindən təqdir olunur.
İbrahimova Gülzar İsaxan qızı, Avrasiya Universitetinin Elmi işlər üzrə prorektoru, siyasi elmlər üzrə elmlər doktoru, professor